«Печән базарында» театраль-цирклы спектакле (0+)

26 апрельдә бөек татар шагыйре Габдулла Тукайның туган көне билгеләп үтелә һәм бу көнне туган тел көне дә бәйрәм ителә. Шул уңайдан Чаллы мәдәният идарәсе башлыгы Кәрамиев Рүмил Рәүф улы һәм «ҮКС» МБУ хезмәткәрләре Казан дәүләт циркында «Печән базарында» дигән театраль-цирклы спектакльнең премьерасын карап кайтты. 

Спектакль Габдулла Тукайның «Печән базары, яхуд Яңа Кисекбаш» поэмасына нигезләнеп куелган. Бу – театр һәм цирк сәнгате кушылган татар телендә баручы шоу. Спектакльдә шагыйрьнең «Кәҗә белән Сарык», «Шүрәле», «Су анасы», «Акбай» кебек әсәрләре дә кулланыла.
Тамашаның төп герое Тукай үзе, ул, имештер, йоклап китә һәм төшендә үз әкиятләренең персонажларын очрата. «Печән базары» театраль-цирклы спектакле, шигърият, фольклор һәм цирк сәнгатен берләштереп, Габдулла Тукайның туган көнен һәм туган тел көнен иҗади бәйрәм итү буларак тәкъдим ителә.
Спектакль татар халкының иҗади гимнына әйләнгән «Туган тел» җыры белән тәмамлана. 

Фото: © Владимир Васильев / «Татар-информ»: https://www.tatar-inform.ru/news/oda-rodnomu-yazyku-cirk-kazani-rastrogal-zritelei-premeroi-po-tukayu-na-sennom-bazare-5944411