Китапханәдә Шәүкәт Галиев исемендәге әдәби-иҗтимагый премия тапшырылды (0+)
16 сентябрь көнне шәһәр Үзәк китапханәсендә Шәүкәт Галиев исемендәге әдәби-иҗтимагый премия тапшыру тантанасы узды.          Чарада Татарстан Язучылар берлеге рәисе Данил Салихов, Язучылар берлегенең Чаллы бүлеге җитәкчесе Факил Сафин, каләм ияләре Рәшит Бәшәр, Айгөл Әхмәтгалиева, Зимфира Исламова, Сирень Якупова, Флера Мәрданова, Лилия Фәттахова, Рәкит Әбделмәнов һәм премиянең хәйриячесе Римма Идиятуллина катнашты. 2019 ел дәвамында «Көмеш кыңгырау» газетасы белән актив хезмәттәшлек иткән балалар язучысы Рәшит Бәшәр, шулай ук кызыклы, әдәби яктан камил шигырь һәм хикәяләре газетада даими рәвештә дөнья күргән дүрт укучы бала – Чаллының 41 нче мәктәп укучысы Роза Әмирова, Балык Бистәсе районы Күгәрчен мәктәбеннән Әдилә Мингарипова һәм Инсаф Гатауллин, Мамадыш районы Кече Кирмән авылыннан Әмир Фәрхуллин әлеге премиянең тәүге лауреатлары дип танылды. Аларга Дипломнар һәм бүләкләр тапшырылды.
|
