«Алга, эрудитлар!» викторинасы (6+)

29 һәм 30 октябрьдә, шулай ук 2 һәм 3 ноябрьдә 13 нче санлы китапханәдә чын эрудитлар көрәше булды. Чарада катнашучылар гади булмаган мәсьәләләрне нәтиҗәле чишә һәм төрле темаларга иркен аралаша белүләрен күрсәтте. Алар командаларга бүленде һәм сорауларга җавап бирә башлады.  

Викторина алтышар сораулы биш турдан торды. Турларның темалары: «Хайваннар», «Үсемлекләр», «Кеше», «Җир» һәм «Барысы турында». Бу сораулар гомуми белемнәрне, фактларны чагыштыра һәм көтелмәгән бәйләнешләр таба белүне, ә иң мөһиме – командада нәтиҗәле эшләү сәләтен сынап карауга юнәлдерелде. Сораулар төрле иде, мәсәлән: «Кеше скелетының иң кечкенә сөяге ничек аталаК?», яки «Кайсы үсемлекнең тамыры юк?», яки «Титикака нәрсә ул?». Киң белемнәре һәм логик фикерли белүләре балаларга барлык сорауларга җавап бирергә ярдәм итте.