«Мәңге яшь буласым килә» тематик сәгате (16+)

26 апрель – бар татар халкы өчен истәлекле көн. Бүген Татарстан һәм Россия татарлары Габдулла Тукайның тууына 138 ел булуны билгеләп үтә. Тукай татар халкының иң яраткан шагыйре һәм татар тарихында аерым бер урын алып тора, рухи үсештә, әдәбиятта, мәдәнияттә үзе бер чорны аңлата, шунлыктан халык хәтерендә мәңге онытылмый.

Аның шигърияте матурлыкка, яхшылыкка өйрәтә, мәрхәмәтле, гадел һәм кыю булырга чакыра. 
13 нче санлы китапханәдә укучылар Г.Тукай язмышы һәм аның бәхетсез балачагы, ятимлек ачысын татуы турында тулырак мәгълүмат алды, аның биографиясеннән кызыклы фактларны ишетте, Тукайның хатирәләрен һәм татар халкының бөек улы турында аның замандашлары истәлекләрен тыңлады. Шагыйрьнең иҗаты турында сөйләү аның шигырьләрен уку белән үрелеп барды. Шулай ук чарада катнашучылар «Тукай буенча татар кодексы» белән танышты – ул киләчәк буын өчен бөек тарихны сакларга ярдәм итәчәк ата-бабалар мирасы. Чара «И мөкатдәс, моңлы сазым! Уйнадың син ник бик аз?» дигән презентация белән үрелеп барды.