«Мәҗбүри булмаган Ё» бәйрәм-уен чарасы (6+)

21 февральдә 10 нчы санлы китапханә мәктәп укучыларын Халыкара туган тел көнен бәйрәм итү кысаларында «Мәҗбүри булмаган Ё» бәйрәм-уен чарасына чакырды.
Балалар танып белү сәяхәтенә юл тотты, аның барышында матур рәсемле презентация ярдәмендә, рус алфавитының 7 нче хәрефе – «Ё» белән танышты, аның рус телендәге гаҗәеп маҗаралары турында белде. 

Чараның икенче өлешендә укучылар җавапларында «Ё» хәрефе булган табышмакларны чиште. Шуннан соң алар кызыклы уеннарда һәм бәйгеләрдә катнашты: «Эстафета» уенында «Ё» белән сүзләрне искә төшерде, «Ё-Пирамида» төзеде, ребуслар чиште, һәм тагын «Слухачи» бәйгесендә – Г. Юдинның «Ёжик и ёршик» әкиятен тыңлап, анда ничә тапкыр «Ё» хәрефе искә алынуын санады.

Чара күңелле һәм файдалы үтте. Балалар әлеге хәрефнең әһәмиятен бәяләде һәм аның турында онытмаска сүз бирде.