«Табигать могҗизалар белән тулы» танып белү-уен программасы (6+)

Шәһәр үзәк китапханәсе хезмәткәрләре мәктәп яны лагере балалары өчен «Табигать могҗизалар белән тулы» дигән танып белү-уен программасы уздырды. Китапханә кунаклары Кикимора һәм табигатьне өйрәнүче белән бергә урман сукмаклары буйлап сәяхәткә юл тотты. Юлда балалар экологик кагыйдәләр белән танышты, табигатьтә зарарлы, кирәкмәгән үсемлекләр һәм хайваннарның булмавы, аларның барысы да үзара тыгыз бәйләнгәнлеге, һәрберсе үзенчә матур һәм файдалы булуы турында белде. 

Алар «Ашарга яраклы, ашарга яраксыз», «Иң, иң», «Телеграмманы таны», «Экологик хәл» бәйгеләрендә катнашты. Кызлар һәм малайлар «Гөлләмәне җый», «Бакылдавык бака», «Бизәлгән агач», «Чүпле», «Дүрт таҗлы чәчәк» уеннарын азарт белән уйнады, Урман хуҗасының табышмакларын чиштеләр. «Чүп күпме вакыт эчендә таркала?» дигән видеороликны зур кызыксыну белән карадылар.