Китапханәдә «Бар дөньяны буярмын» күргәзмәсе ачылды (12+)

Шәһәр үзәк китапханәсенең Кече картиналар галереясында рәссам Светлана Солоникованың шәхси күргәзмәсе ачылу тантанасы узды.

Вернисаж хөрмәтенә сәламләү сүзләре белән Светлана Николаевнаның мөгаллиме, ТР Халык рәссамы Мадияр Хаҗиев һәм «Россия рәссамнар берлеге»нең Чаллы бүлеге рәисе Ленар Әхмәтов чыгыш ясады. Рәссамның беренче күргәзмәсе уңаеннан, аның туганнары, дуслары һәм хезмәттәшләре җылы тәбрикләү сүзләрен җиткерде. Чыгыш ясаучыларның һәрберсе рәссам ханымның ихласлылыгын һәм иҗади дәртен, аның үзенчәлекле стилен ассызыклап узды һәм киләчәктә иҗади уңышлар теләде.
Рәссамның кызы Юлия әнисен видео аша котлады. 

Юлияның Латин Америкасында яшәүче дуслары Светлана Солоникованың Эквадор һәм Венесуэла күренешләрен сурәтләгән рәсемнәре турында тулырак мәгълүмат бирде. 
Автор-башкаручылар Лариса һәм Андрей Даниловларның, шәһәр шагыйрьләренең чыгышлары кабатланмас атмосфера тудырды. Рәсем һәм җыр сәнгате, шигърият бу кичне бергә үрелеп барды һәм катнашучыларга уңай хис-кичерешләр бүләк итте. 
Теләге булган һәркемне күргәзмәдә көтеп калабыз, рәхим итегез.