«К. Ушинскийның әкият дәресләре» әдәби сәгате (6+)

20 март көнне 3 нче санлы китапханә, «Балалар язучылары – балаларга» программасы кысаларында, яшь китап сөючеләр өчен «Константин Дмитриевич Ушинскийның әкият дәресләре» дигән әдәби сәгать уздырды.
Ушинский кечкенә балаларны кызыклы һәм җиңел итеп укырга һәм язарга өйрәтергә хыялланган. Ул кызыклы хикәяләр, әкиятләр, табышмаклар уйлап чыгара башлаган. Шулай итеп башлангыч мәктәп өчен ике дәреслек барлыкка килгән. Алар «Туган тел» һәм «Балалар дөньясы» дип аталган, һәм бу әсбаплар буенча балалар мәктәптә укыган. Ушинский китаплары балаларга үзләре яши генә башлаган гаять зур дөньяның зур һәм кечкенә серләрен ача!

Чарада катнашучылар Константин Дмитриевичның әдәби иҗаты белән танышты, зур кызыксыну белән «Как рубашка в поле выросла», «Четыре желания» хикәяләрен тыңлады, һәр әкиятне һәм хикәяне укыганнан соң, геройларының кылган гамәлләре буенча фикер алышты, үз фикерләре белән уртаклашты, викторина сорауларына җавап бирде, «Бергә кысан, ә аерым ямансу», «Яхшылык итсән, яхшылык күрерсең» кебек әйтемнәрнең мәгънәсен аңлатты. Чара азагында укучылар К. Д. Ушинский әкияте буенча төшерелгән «Охотник до сказок» мультфильмын карады.