«Спорт белән шөгыльләнергә кирәк» әдәби-уен программасы (6+)

Нинди карлы кыш бездә! Һәм бу очраклы гына түгел! 21 гыйнварда дөньяда Бөтендөнья кар көне билгеләп үтелә. Аның икенче төрле исеме – Халыкара кышкы спорт төрләре көне. Әлеге бәйрәм 2012 елдан бирле Халыкара чаңгы спорты федерациясе инициативасы буенча билгеләп үтелә. 

Бәйрәмнең максаты – кышкы спорт төрләренә кызыксынуны арттыру һәм балаларны, яшьләрне актив тормыш рәвеше алып баруга җәлеп итү. 
Без дә Укырга, рәсем ясарга, кул эшләре белән шөгыльләнергә яратучылар клубының чираттагы очрашуын кышкы спорт төрләренә багышладык. Һәм иң мөһиме, спортның кешедә чыдамлылык һәм җитезлекне үстерергә, нерв системасын ныгытырга, максатчанлылыкны һәм үздисциплинаны үстерергә, характер, төз гәүдә булдырырга, вестибуляр аппаратны үстерергә, сулыш системасын күнектерергә һ.б. ярдәм итүе турында белде. 

Балалар 37 кышкы спорт төре барлыгын белде һәм презентация карау барышында аларның иң мөһимнәре белән танышты. Кызганыч, клубка йөрүче балалар арасында профессиональ кышкы спорт төрләре белән шөгыльләнүчеләр, түгәрәкләргә һәм секцияләргә йөрүчеләр юк. Шулай да кышын әти-әниләре белән яки үзләре генә чаңгы һәм тимераякларда йөрүче балалар бар. Бу чыннан да шәп!

Чараның күңел ачу бүлегендә укучылар кышкы спорт төрләренең спорт җиһазлары турында табышмакларны чиште, мәсәлән: «Үзе – бер такта, Әмма исеме белән горур, Аның атамасы …» һ.б. Ә иҗади эштә ярыш урыннары буенча спортчыларның фигураларын ачыкларга кирәк булды.  Барысы да сынауларны җиңеп чыкты!