Чал чәчегез алдында башыбызны иябез (18+)
10 нчы санлы китапханә «Безнең йорт» җирле иҗтимагый үзидарәсе белән берлектә Халыкара өлкәннәр көненә багышланган «Чал чәчегез алдында башыбызны иябез» дигән әдәби-музыкаль кичә уздырды. Кичә башында җирле иҗтимагый үзидарә рәисе Л.В.Кутузова чарага килүчеләрнең барысын да бәйрәм белән тәбрикләде, сәламәтлек, тыныч тормыш, шатлык-куанычлар һәм озын гомер теләде. Бәйрәм котлауларына китапханә хезмәткәрләре дә кушылды һәм кунакларга кечкенә генә бүләкләрен тапшырды. Чара барышында танылган авторларның күркәм хатын-кызларыбызга багышланган бик күп шигъри юллары яңгырады. Кичәнең «Яшьлегем җырлары» дип аталган музыкаль өлеше аеруча ошады, кунакларның һәрберсе яраткан җырын башкара алды, ә башкалар бик теләп аңа кушылды. Хуш исле чәй һәм татлы тәм-томнар кичәнең матур һәм күңелле дәвамы булды. |