«Кыю кош суыктан курыкмый» экологик-танып белү сәгате (0+)

12 һәм 16 гыйнвар көннәрендә 10 нчы санлы китапханә мәктәпкәчә яшьтәге балаларны гыйнвар аенда билгеләп үтелүче «Кышлаучы кошлар көне» Бөтенроссия экологик бәйрәменә багышланган чарага чакырды. 
Китапханәче сөйләгәннәрдән балалар әлеге бәйрәмнең ничек барлыкка килүе, кышлаучы һәм җылы якка очучы кошлар, кайсыларының кышларга калуы, кошларга ничек ярдәм итәргә, нәрсә һәм кайчан ашатырга, үз кулларың белән җимлекләрне ничек ясарга һәм дөрес итеп эләргә икәнен белде. 

Очрашу барышында нәни кунакларыбыз китапханә хезмәткәрләре белән бергә кышлаучы кошлар турында табышмакларны чиште, шулай ук «Кошлар концерты», «Җимлектә кем бар?» уеннарында катнашты. Чараны йомгаклап, балалар үзләрен чын рәссамнар ролендә сынап карады – үзләре яраткан кошларның рәсемен ясады.