«Китап укыйсым килә. Нәрсәдән башларга?» Ачык ишекләр көне (6+)

21 майда Үзәк балалар модель китапханәсендә яшь укучылар өчен чын бәйрәм — Гомумроссия китапханәләр көненә багышланган «Китап укыйсым килә. Нәрсәдән башларга?» дигән Ачык ишекләр көне узды.
«Мин китап белән бергә үстем» экскурсиясе кысаларында балалар китапханә буйлап танып белү сәяхәте кылды. Алар китапханәнең китаплар саклаучы йорт кына түгел, ә иҗат, дуслык һәм ачышлар хакимлек итүче чын дөнья булуы турында белде. Балалар кызыксынып кәгазь китапның серле туу процессын өйрәнде, ә күңелле уеннар һәм китап персонажы – мөлаем шамакай Ириска белән ихлас әңгәмәләр очрашуны чын-чынлап онытылмас итте. 

«Яшәгән ди, булган ди китап» әдәби фантазиясе һәр кунакны иҗат иясенә әйләндерде. Илһамланган балалар үзләре үз китаплары авторына әверелде: алар китапның ерак җирләргә сәфәре турында сюжет уйлап тапты һәм аның өчен матур рәсем-иллюстрацияләр ясады.
«Әкиятләр илендә» дигән тылсымлы мультзалда бүген яраткан әсәрләр битләре җанланды. Зур экранда яшь укучылар классик һәм хәзерге заман балалар китаплары мотивлары буенча төшерелгән танып белү анимацион фильмнарын карады.
Әлеге көн балаларга бик күп уңай хисләр генә түгел, ә иң әһәмиятлесен – яңа ачышлар һәм маҗаралар эзләп кунакчыл китапханәгә янәдән әйләнеп кайту теләге бүләк итте.