«Китапханә – мәгълүмат диңгезендә юл күрсәтүче» Ачык ишекләр көне (6+)

21 майда 15 нче санлы китапханәдә Гомумроссия китапханәләр көненә багышланган «Китапханә – мәгълүмат диңгезендә юл күрсәтүче» дигән Ачык ишекләр көне узды. 
Бу көнне китапханә теләге булган барлык кешеләр өчен ишекләрен ачты. Иң нәни укучылар өчен «Безгә кунакка чакырабыз» дигән театральләштерелгән экскурсия үткәрелде. Китаплар Патшабикәсе һәм Белмәмеш белән бергә яшь укучылар китап киштәләре буйлап сәяхәт кылды, китапханә эше, үз-үзеңне тоту һәм китапларны куллану кагыйдәләре белән танышты. Китапның төзелеше, тышлыклар төрләре, китап кыстыргычының нәрсә өчен икәнлеге һәм китапның барлыкка килү тарихы турында белде. Балалар китапханә патшалыгы буйлап үтә, журналлар һәм китаплар карый алды.

Көн дәвамында ата-аналар һәм балалар өчен «Китаплар укыйбыз – дөньяны ачабыз» дигән әдәби эскәмия оештырылды, алар анда рольләргә бүлеп әкиятләр һәм хикәяләр укыды. Балалар укыганнары турында фикерләре белән уртаклашты, ә өлкәннәр бик теләп балачакларыннан яраткан китапларын искә төшерде. 
Барлык теләге булганнар «Үзеңне китапханәче итеп хис ит» дигән китапханә эшендә катнашты. Аларга башка укучылар белән аралашу, яраткан китапларын тәкъдим итү һәм әдәбият сайлауда ярдәм итү мөмкинлеге тудырылды. 
Ачык ишекләр көне – китапханәнең яңа идеяләр белән тулып торуы һәм барысын да уку, белемнәр һәм иҗат дөньясына чакыруын күрсәтү өчен бик яхшы мөмкинлек.