«Сайрар кошларны яратып каршылыйк…»: экология сәгате

17 март көнне шәһәр Үзәк китапханәсенең татар әдәбияты һәм туган якны өйрәнү бүлеге балаларны «Сайрар кошларны яратып каршылыйк…» дигән экология сәгатенә чакырды.

Чара кошларның күптөрлелеге һәм тормышы, табигатьтә һәм кеше өчен аларның әһәмияте турында танып белү әңгәмәсеннән башланды. Чөнки нәкъ кошлар кешене һәм хайваннарны борчучы, кайвакыт нык йөдәтүче бөҗәкләрдән саклый, тиз үрчүче зарарлы бөҗәкләр санын сизелерлек киметә. Балалар үзләре дә, «Барлык кошларны нәрсә берләштерә?», «Алар нәрсә белән туклана?», «Ни өчен күп кенә кошлар көзен җылы якларга кучеп китә?» кебек сорауларга җавап биреп, белемнәрен һәм тапкырлыкларын күрсәтте. 
Укучылар кошлар, аларның тышкы кыяфәте һәм гадәтләре турында күп кенә кызыклы мәгълүмат алдылар. Чара азагында балалар канатлы дусларыбызга ничек ярдәм итәргә: оялар ясарга, ашатырга, аеруча кыш көне, җимлекләр булдырырга кирәклеге, аларга ташлар атарга, ояларын туздырырга ярамавы турында тагын бер кат искә төшерде.