«Китап дигән могҗиза» китапханә дәресе (0+)

23 майда, Новосибирск өлкә яшьләр китапханәсе оештырган «Китапханә диктанты» Бөтенроссия агарту акциясе кысаларында, 1 нче санлы мәгълүмати-китапханә үзәгендә яшь укучылар «Китап дигән могҗиза» дигән китапханә дәресенә килде.

Балалар китапның барлыкка килү тарихыннан кызыклы фактлар белән танышты, борынгы заманнарда китапларның кәгазь булмавы һәм беренче китапларның папирустан, балчыктан һәм каен тузыннан ясалуы турында белде. Китапны дөньяга чыгаруның җиңел булмавы һәм аны тудыруда кемнәр хезмәт куюы турында сөйләгәнне зур кызыксыну белән тыңладылар. Чара барышында укучылар табышмаклар чиште, «Китап нәрсә ярата», «Көлсылуга булышыйк», «Тылсымлы әйберне танып бел» уеннарында катнашты һәм әкият геройлары турында сорауларга җавап бирде. Чара балаларга тылсымлы һәм кызыклы китаплар дөньясын ачуда ярдәм итте.