Бөтендөнья татар конгрессы вәкиле Илгиз Халиков Үзәк китапханә белән танышты (12+)

15 сентябрь көнне Муса Җәлил исемендәге шәһәр үзәк китапханәсендә Бөтендөнья татар конгрессы Башкарма комитеты җитәкчесе урынбасары Илгиз Илдар улы Халиков белән очрашу булды.

Чарада шәһәребез язучылары Әнвәр Шәрипов, Рәкит Аллабирде, “Ләйсән” әдәби иҗат берләшмәсе әгъзалары Зәбир Хәлимов, Роза Хәмидуллина, Рушания Гыйләҗева, “Көмеш кыңгырау” газетасы мөхәррире Ризидә Гасыймова, “Мәйдан” журналы мөхәррире Лилия Фәттаховалар катнашты.

Очрашу дәвамында Илгиз Илдар улы китапханәнең туган якны өйрәнү, сәнгать, әдәбият тарихы музее бүлекләре белән якыннан танышты. Түгәрәк өстәл артында сөйләшү барышында кунак Татар конгрессының эшчәнлеге, аның киләчәккә планнары белән таныштырды. Очрашуда журналистлар, язучылар үзләрен кызыксындырган сорауларга җавап алды.

Илгиз Илдар улы Конгресс исеменнән китапханәгә өч телдә басылып чыккан “Мәңге яшә, газиз Ватаныбыз!” китабын бүләк итте.