«Алмалы күңел ачулар» әдәби уены (6+)

23 июньдә 10 нчы санлы китапханәдә гадәти булмаган очрашу узды. Ул язучы яки шагыйрьгә түгел, рәссам яки актерга да түгел, ә АЛМАга багышланды! Иң гади һәм яраткан җимешкә. «Алмалы күңел ачулар» дип исемләнгән әлеге әдәби уенга мәктәп яны лагере балалары чакырылды.

Уенда катнашучылар өчен бәйге биремнәре алманың файдалы һәм тәмле җимеш булуын дәлилләргә тагын бер кат мөмкинлек бирде. «Кем күбрәк алмадан әзерләнгән ризык исемнәрен искә төшерә?» дип аталган беренче биремне барысы да җиңеллек белән үтте. Һәрберсе алмадан әзерләнгән үз яраткан ризыгын атады – бу пироглар һәм корица белән пешкән алмалар, компот һәм джем, алма кагы һәм мармелад, шарлотка һ.б.
Командаларга шулай ук «Күңелле пешекчеләр», «Ялгаучылар», «Мактаулы алма», «Җиләк-җимешле бутагыч», «Алма кисәкләре», «Кулинар аукцион» бәйгеләре тәкъдим ителде. Әмма балаларны аеруча «Алмага туры китер» бәйгесе шатландырды. Ул дартс уены ярдәмендә уздырылды. Балалар укларны атып, «алмалы» сорауларга җавап бирде – уен бик күңелле үтте. 
Чара катнашучыларга татлы күчтәнәчләр өләшү белән тәмамланды.