Быел «Мәдәни марафон» кинематографка багышлана (6+)

Ел саен уздырылучы «Мәдәни марафон» акциясе 2021 елның 8 ноябрендә старт алды һәм 10 декабрьгә кадәр дәвам итәчәк. Ул кино тарихындагы мөһим вакыйга — Россиядә 125 ел элек беренче киносеанс узуга багышлана. Мәктәп укучылары мавыктыргыч онлайн-тест үтә алачак һәм гадәттә мәктәптә өйрәнелми торган сәнгать белән танышачак. Интерактив биремнәр кино төзелешен аңларга, режиссерларның безнең хисләр белән ничек идарә итүен һәм  нинди ысуллар куллануларын белергә ярдәм итәр. Проектны оештыручылар — Мәдәният министрлыгы, Россия мәгариф министрлыгы һәм «Яндекс». 

«Мәдәни марафон»да катнашу өчен, рәсми сайтта теркәлергә кирәк. Проектка теләге булган һәркем – укытучылар, мәктәп укучылары, аларның әти-әниләре кушыла ала. Тестны үтү өчен 15-25 минут җитә, теләсә кайсы вакытта башларга мөмкин. Катнашучылар бүләкләр – «Яндекс.Станции Лайт» ала алачак. Бу призларга 100 укытучы һәм 500 укучы ия булачак. 

«Мәдәни марафон»ның максаты – мәктәп укучыларын яңа предмет белән мавыктыру, аларны әһәмиятле кинотасмалар белән таныштыру һәм уйлануларга, иҗади эзләнүләргә илһамландыру. Киноны өйрәнеп һәм аның буенча фикер алышып, катнашучылар нәфис әсәрләрне анализларга һәм үз фикерләрен формалаштырырга өйрәнәләр. Проект кысаларында укучылар шулай ук Россия киносы профессионаллары белән очраша, үз мәктәпләрендә киноклуб оештыра һәм үзләрен мини-фильмнар ясауда сынап карый алачаклар.