Бөек Ватан сугышы тарихта миллионлаган төрле яшьтәге һәм төрле милләт кешеләренең бөек патриотик күтәрелеш чоры буларак кереп кала. Ул еллардагы Татарстан язучылары һәм шагыйрьләре эшчәнлеге менә шундый патриотлык үрнәге булып тора.  Алар, каләм һәм корал тотып, фронтның алгы сызыгында дошманга каршы көрәшә. 

Татар әдәбиятының иң күренекле вәкилләре – Муса Җәлил, Фатих Кәрим, Шәрәф Мөдәррис, Гали Хуҗи, Әхмәт Фәйзи, Сибгат Хәким, Мәхмүд Максуд, Мөхәммәт Садри, Абдулла Алиш, Гадел Кутуй, Hyp Баян – берсе артыннан берсе хәрби кием кия. 

СССРның барлык әдәбияты кебек үк, татар әдәбияты да сугыш елларында совет халкының фашист басып алучыларына каршы көрәшенә хезмәт итә. Сугыш вакытында алгы сызыкка совет кешесенең батырлыгын, патриотлыгын һәм рухи ныклыгын чагылдыручы шигърият чыга. Ф. Кәрим, Н. Баян, Ә.Фәйзи, Ш.Маннур, С.Хәким, М.Садри, З.Нури, Ш. Мөдәррис, С. Батталның патриотик шигырьләре,  К.Нәҗми, Г. Бәширов, И. Гази, Х.Усманов, Ф. Хөсни, Г.Әбсәләмов, А.Шамовның хикәя һәм очерклары,  Т.Гыйззәт, Р.Ишморат, Н.Исәнбәт, М.Әмир пьесалары сугыш чорының сәнгати елъязмасына әверелә. Муса Җәлилнең «Моабит дәфтәрләре» исә мәңгелек дан алды. Аның шигърияте бөтен татар гражданлык лирикасының асылын үз эченә ала, шул ук вакытта аның үсешенә яңа бер адым да була. 

«Минем Хәтер китабы» баш редактора Анатолий Иванов сүзләренә караганда, 1941 елда Татарстаннан 53 язучы, шагыйрь һәм журналист фронтка китә. (Корал һәм каләм белән көрәштеләр – «Татарстан хәбәрләре») – http://www.tatarnews.ru/articles/1925