Әфган сугышында катнашкан сугышчы-интернационалистлар белән очрашу (16+)

Әфган сугышы вакыйгалары да тарих төпкеленә төшә бара. Дәүләт тарихыннан бу саннарны сызып атарга ярамый һәм үзләренең сәламәтлекләрен, хәтта гомерләрен кызганмаган сугышчыларны оныту мөмкин түгел.

Шәһәр Үзәк китапханәсенең комплекслы хезмәт күрсәтү бүлеге хезмәткәрләре Әфган сугышы геройлары белән чаралар уздырды. Кичәгә сугышчы-интернационалистлар Миронов Юрий Леонидович, Әхмәтҗанов Равил Әхәт улы, Галәветдинов Фәрит Алмаз улы, Мөхәммәтҗанов Фәнис Юныс улы чакырылды.

19 февраль көнне Кама автомеханика техникумы белән берлектә «Хәтер сөйләсен…» дигән очрашу кичәсе үтте. 

Китапханәче чарага килүчеләргә Әфган сугышының тарихи фактларын искә төшерде, шул вакыйгалар турында сөйләүче видеороликлар күрсәтте. Сугыш ветераннары көрәш кырында һәлак булган полкташлары турында хатирәләре белән уртаклашты.

21 февраль көнне өлкән сыйныф укучылары өчен Әфган сугышына багышланган хәтер кичәсе узды.  

Укучылар Әфганстан җирендә сугышның башлану тарихы һәм безнең солдатларның күрсәткән батырлыклары турында мәгълүмат алды. Ветераннар үзләренең Әфганстанда хезмәт иткән көннәре турында истәлекләре белән уртаклашты. Генерал-лейтенант Борис Всеволодович Громовның машина йөртүчесе булган Равил Әхәт улы Әхмәтҗанов сөйләгәннәр аеруча зур кызыксыну уятты. Илдус Галимҗан улы Ахунов шул дәһшәтле сугыш елларында иҗат иткән җырларын гитарага кушылып башкарды.

Чара азагында һәлак булган сугышчы-интернационалистларны бер минутлык тынлык белән искә алдылар.