23 сентябрьдә шәһәр китапханәләрендә ачык ишекләр көне узды (6+)

Бу көнне барлык китапханә филиалларында да  прошёл Библиодень «Рәхим итегез!» дигән китапханә көне — барлык яшьтәге укучыларны китапханә тынычлык йорты гына түгел, ә уку, иҗат һәм ачышлар өчен җанлы киңлек тә дигән уртак идея белән берләштерүче зур бәйрәм. 
Иң нәни укучылар өчен 15 нче санлы китапханәдә «Күрмәгән-белмәгән юлларда» дигән экскурсия узды. Китап Патшабикәсе һәм Белмәмеш белән бергә балалар китапханә кагыйдәләре белән танышты, журналлар һәм китаплар карады. Яшүсмерләрне «Китапханә ребусы» һәм «Мин китап турында нәрсә беләм» уеннары белән «Тылсымлы китапханә дөньясы» дигән танып белү сәгате көтте, ә көн дәвамында «Китапханәче һөнәре» дигән викторина һәм «Китап кәрҗинендә яңа китаплар» дигән күзәтү эшләде. 14 нче санлы китапханәдә эстафетаны «Китап дусларын чакыра» дигән экскурсия дәвам итте. Мәктәпкәчә яшьтәге балалар һәм беренче сыйныфлылар «абонемент», «уку залы» һәм «формуляр» төшенчәләренең нәрсә аңлатуын белде, киштәләрдә китапларны \зләп табарга өйрәнде һәм әкият геройлары турында табышмаклар чиште. 8 нче санлы балалар китапханәсендә кунаклар яраткан әкият геройлары белән очрашты, китапханә төзелеше һәм китапларны урнаштыру кагыйдәләре белән танышты. Китапханәче китапханә тарихы белән уртаклашты һәм үз һөнәренең серләрен ачты: бу укучыларга китаплар бирү генә түгел, ә чын тылсым — иң мөһим сорауларга җаваплар табарга ярдәм итү дә.
5 нче санлы китапханәдә һәм 12 нче санлы китапханәдә мавыктыргыч экскурсияләр үтте. Аларның берсендә яшь укучылар «Безгә кунакка килегез» сәяхәтенә юл тотты: китапны куллану кагыйдәләре турында мультфильм карады, азарт белән «Әйбер югалды» бәйгесендә һәм «Әкиятне таны» викторинасында катнашты. Икенче китапханәдә балаларны уен программасы һәм киштәләрдә китаплар эзләү белән «Китап каласы» каршы алды, очрашу тантаналы «Яшь укучы анты» белән тәмамланды . 3 нче санлы китапханәдә укучыларны «Китап — белем чыганагы» экскурсиясе, китап күргәзмәләре, яраткан китап белән фотозона һәм «Әдәби эрудит» викторинасы көтте, анда балалар белемнәрен күрсәтте. Шунда ук китапханәчеләр үз-үзеңне тоту кагыйдәләре һәм ремонт таләп итүче китапларны ничек «дәваларга» икәнлеге турында сөйләде. 13 нче санлы китапханәдә шәһәрдәшләр өчен күптөрле программа әзерләделәр: укучылар «Китапханәгә килү өчен 7 сәбәп» экскурсиясендә булды һәм китапханәнең тыныч һәм күңелсез урын түгеллегенә, ә китапларның хәтта 3D һәм 4D форматларда да булуына инанды. Китапханәгә килгән өлкәннәр «Сезонның хит китаплары» дигән әдәбиятка күзәтүне тыңлады, Н. Свечин, Ю. Яковлева, В. Вербининаларның ретро-детективлары һәм совет әдәбияты классиклары әсәрләре белән танышты. «Китапханә сез уйланганга караганда якынрак» дигән урам акциясендә визиткалар тараттылар һәм китапханәгә чакырдылар, «Акыллар көрәше: китаплар ярышы» дигән әдәби уенда балалар «Әсәр геройлары — хайваннар», «Әкияти маҗаралар» һәм «Тылсымлы әйберләр» дигән өч раундта белемнәрен сынап карады.

10 нчы санлы китапханәдә башлангыч сыйныф укучылары өчен «Маршак балаларда кунакта» дигән шигърият сәгате узды: балалар «Разноцветная книга», «Кот и лодыри», «Сказка о глупом мышонке» әсәрләрен искә төшерде, табышмаклар чиште һәм «Юлны дәвам ит» уенында катнашты. Шунда ук «Ышаныч» халыкка комплекслы социаль хезмәт күрсәтү үзәгенең көндезге бүлегендә тәрбияләнүчеләр өчен көз һәм миләшкә багышланган «Кызыл миләш учагы» дигән әдәби-музыкаль попурри оештырылды. 11 нче санлы китапханәдә мәктәпкәчә яшьтәге балалар рус әкиятләре буйлап сәяхәткә юл тотты: тылсымлы әфсен сүзләрен әйтте, викториналар чиште, «Маша һәм аю» әкиятен куйды һәм «Төлке һәм торна» мультфильмын карады. Башлангыч сыйныфлылар риваятьләр дөньясына кереп чумды, Илья Муромец, Добрыня Никитич һәм Алёша Поповичлар белән танышты һәм риваятьнең тылсымлы әкияттән аермасы турында белде. 16 нчы санлы китапханәгә иртәдән үк мәктәпкәчә яшьтәге балалар килде: алар өчен «Нәниләр өчен китап» экскурсиясе узды, аның барышында балалар дөнья китапханәләре, китапханәгә язылырга килгән Убырлы Карчык турында сөйләгән Укымышлы мәче һәм юлбасар Бармалей белән очрашты, соңгысын балалар физзарядка белән дәвалады. Көн дәвамында монда «Китап ярдәмчеләре» мастер-классы эшләде, анда яшь укучылар оригами техникасында китап кыстыргычлары ясады. Яр Чаллыга нигез салынуга 400 ел булу уңаеннан китапханәгә килүчеләр өчен «Чаллы: үз белемнәреңне тикшер» викторинасы үткәрелде, ә теләге булганнар шигърият һәм көзге кәефкә багышланган китап күргәзмәсе белән «Китап кул чатыры астында көз» акциясендә катнашты. 23 нче санлы китапханәдә  «Китапханә кунаклар көтә» дигән китап хәзинәләре көне узды. Барлык теләге булганнар өчен китапханә буйлап экскурсия үткәрелде: өлкәннәр һәм балалар бик теләп китаплар дөньясына кереп чумды, китап фондының байлыгы турында белде һәм китапханәгә килүнең ни өчен шулкадәр мөһим һәм файдалы булуы турында фикер алышты. Уку залында «Китапханәдә күңелле сәгать» уеннары оештырылды, ә яшь укучылар өчен «Китап ярдәмчесе» китап кыстыргычлары ясау буенча мастер-класс үткәрелде. Кунаклар өчен мавыктыргыч китап күргәзмәләре әзерләнде, совет һәм чит ил авторларының яңа нәфис әдәбиятына аерым игътибар бирелде. 
Әле тагын бу көнне китапханәләр һәр укучыга – нәниләрдән өлкәннәргә кадәр – күңеленә хуш килгән шөгыль табарга мөмкин булуын күрсәтте. 1 нче санлы мәгълүмати-китапханә үзәгендә  «Кадрда — Китапханә! Китап! Укучы!» бәйрәме берничә буынны берләштерде: мәктәпкәчә яшьтәге балалар Китап илен өйрәнгән һәм китапханә бүлекләре белән танышкан арада, башлангыч сыйныф укучылары азарт белән «әкияти пазллар» җыйды һәм «Әкиятләр арбасы» уенында табышмаклар чиште. Өлкәннәр дә читтә калмады — алар өчен яңа китапларга күзәтү әзерләделәр, анда хәзерге заман прозасына да, классиканың янәдән чыгарылган басмаларына да урын табылды.  
6 нчы санлы китапханәдә мәктәпкәчә яшьтәге балалар зур кызыксыну белән китап киштәләрен өйрәнде, иң акыллы энциклопедияләр белән танышты һәм китап саклау бүлегенә күз салды. Аннан соң иҗат итәргә вакыт җитте — «Китап кыстыргычы» мастер-классында эш кайнады, һәм балалар үз куллары белән яраткан китаплары өчен китап кыстыргычлары ясады. Бармакларны язганнан соң, балалар интеллектуаль азарт зонасына күчте: «Үз белемнәреңне тикшер» әдәби квизында берсе артыннан берсе сораулар яуды, һәм балалар берсен-берсе бүлдереп, әкиятләрне яхшы белүләрен күрсәтеп, кул күтәрде. «Яраткан әдәби герой» рәсемнәр бәйгесе чараның кульминациясе булды — катыргы кәгазьдә Чебурашка, Карлсон һәм Буратино җанланды. Көн уеннар белән тәмамланды: арыган, әмма бәхетле балалар өстәл уеннары уйнады һәм пазллар җыйды, китап патшалыгына кире әйләнеп кайтырга вәгъдә итте. 
24 нче санлы китапханәдә уртанчы сыйныф укучылары өчен үз программалары табылды: «Янәдән исәнмесез!» дигән танып белү марафоны аларны әкиятләрдән алып фәнни-популяр әдәбиятка кадәр фондлар буйлап уздырды, «Үз китабыңны ничек табарга» мини-лекциясе белән таныштырды, ә аннан соң «Китап детективы» интерактивында үзләрен чын шымчы итеп хис итәргә тәкъдим итте, анда командалар киштәләр буйлап шифрланган исемнәрне эзләде. 
Үзәк балалар модель китапханәсендә балаларны чын маҗара көтте: Китап серләре саклаучы белән бергә алар «Китап тарихлары» дигән әдәби сәяхәткә юл тотты, беренче язу серләрен белде һәм төрле гасырларда кешеләрнең нәрсәдә язуларын ачыклады. «Яраткан геройлар вернисажы» дигән рәсем студиясендә балалар, бер-берсенең рәсемнәрен дәвам итәргә тырышып, күзләрен каплаган килеш иҗат итте – бик күңелле булды. «Китап Могҗизалар кыры» китапханә рулеткасы иң зиһенле белгечләрне җыйды: барабанда бөтендөньяга танылган классикларның портретлары урнашкан иде, һәм катнашучылар язучыларның тормышы һәм иҗаты турында катлаулы сорауларга җиңеллек белән җавап бирде. 
Китапханә көне китапханәнең яңа идеяләр белән тулы һәм һәрвакыт үз укучыларына шат булуы турында искә төшерү өчен бик яхшы сәбәп булды.