«Укыйбыз. Яратабыз. Горурланабыз» фестивале (6+)

24 апрельдә 6 нчы санлы китапханәдә җылы һәм күңелле рухта Габдулла Тукайның тууына 140 ел тулуга багышланган «Укыйбыз. Яратабыз. Горурланабыз» фестивале узды. Чараның башында уртанчы сыйныф укучылары зур кызыксыну белән Чаллы шагыйре, «Золотые россыпи» әдәби берләшмәсе җитәкчесе Әхмәтҗанов Равил Мохтар улы сөйләгәннәрне тыңлады. Ул үзенең Тукай иҗаты белән беренче тапкыр танышуы турында хатирәләре белән уртаклашты, аның әсәрләренең татар мәдәнияте өчен әһәмияте һәм бөек шагыйрь шигъриятенең хәзерге заман авторларын ничек итеп илһамландыруы турында сөйләде. Фестиваль кысаларында укучылар Габдулла Тукайның «Кәҗә белән сарык» әсәре буенча викторинада катнашты, бу Тукайның яраткан татар халык әкиятләре дөньясына кереп чумарга мөмкинлек бирде. Мәктәп укучылары һәм чара кунаклары башкаруында шагыйрьнең дулкынландыргыч шигырьләре яңгырады. «Шүрәле» мультфильм-әкиятен һәм Тукай мәхәббәте турында документаль фильмны күрсәтү бәйрәм рухын тагын да тулыландырды.

«Тукай һәм аның чоры» күргәзмәсендә авыл көнкүреше әйберләре тәкъдим ителде: гармун, татар чигүләре, самавыр, калфак, түбәтәй; картиналар репродукцияләре: Казан, Кырлай авылы сурәтләре, Тукай һәм аның дусларының портретлары. Күргәзмә шагыйрь биографиясе фактларын белергә мөмкинлек биреп кенә калмады, ә аның чоры рухын тоярга, татар көнкүреше тормышы атмосферасына кереп чуму аша аның иҗаты тамырларын аңларга да ярдәм итте.  
Татар музыка уен коралы курай тавышлары кичәгә ямь өстәде. Көйләр чарага милли колорит бирде һәм кунакларга Габдулла Тукай яшәгән һәм иҗат иткән заман рухын тоярга мөмкинлек бирде. Фестиваль буыннарны берләштергән һәм барысына да мәдәни мирасны саклауның әһәмияте турында искә төшерүче чын шигърият бәйрәме булды.