Әхмәтгалиева Айгөл Габдулла кызы

әхмәтгалиева3-150x150Язучы, Татарстан Язучылар берлеге әгъзасы

Айгөл Габдулла кызы Әхмәтгалиева 1973 елның 27 ноябрендә Татарстан Республикасының Актаныш районы Качкын авылында укытучы гаиләсендә туа. Качкын авылы урта мәктәбен тәмамлый. 1990–1995 елларда Казан дәүләт университетының татар теле, әдәбияты, тарихы һәм көнчыгыш телләре факультетында укый.

1990 елда, урта мәктәп тәмамлагач, Казан дәүләт университетының татар теле, әдәбияты, тарихы көнчыгыш телләре факультетына укырга керә. Хезмәт юлын студент елларында ук «Мәгърифәт» газетасында корректор булып башлап җибәрә.

1994 елда гаиләсе белән Чаллы шәһәренә күчеп киләләр, һәм ул «Нур» газетасында корреспондент булып эшли, Чаллы дәүләт педагогия институтында укытучы булып хезмәт итә.

2001-2013 елларда «Мәйдан» журналының әдәбият бүлеген җитәкли. Аннан «Казан утлары» журналына бүлек редакторы булып күчә. 2011 елда Саҗидә Сөләйманова исемендәге кызыксындыру премиясенә лаек була. «Бәхет агачы» драмасы «Яңа татар пьесасы 2012» конкурсында җиңеп чыга; 2013 елда республикакүләм уздырылган конкурста «Таллыкүлдә былбыл бар» повесте – икенче, «Зәңгәр күлмәк» киносценарие – өченче урынны яулый. 2014 елда Мәхмүт Кашгарый исемендәге халыкара хикәяләр бәйгесендә «Капка» хикәясе белән катнашып, Татарстанда беренче, дәүләтара бәйгедә икенче урынны яулый. 2015 елда Оренбург татар дәүләт драма театры А.Әхмәтгалиеваның – «Ул бит кичә иде» пьесасын сәхнәләштерде.

Хикәяләренең кайберләре рус теленә тәрҗемә ителгән. «Җиде ят» хикәясе исә, төрек теленә тәрҗемә ителеп, «Hece Oyku», «Sessiz kuray» (Анкара) журнал-китапларында; балалар өчен язылган «Әби, Илнур һәм математика» хикәясе төрек телендәге «Altin Sincar» («Алтын тиен») җыентыгында урын алган.

А.Әхмәтгалиева – 2009 елдан Татарстан Язучылар берлеге әгъзасы.